新聞標題【民報】挽韮菜花(bân-kù-tshài-hue)
寄件人 E-mail
收件人 E-mail

挽韮菜花(bân-kù-tshài-hue)

 2019-07-09 14:50
韮菜花置四月底五月初會當開始每日挽。這時陣ê台灣中南部是漸漸從寒天(kuânn-thinn)欲轉入去(tsuán-tńg-jı̍p-khì)熱天(jua̍h-thinn)的氣候。圖/Pixabay
韮菜花置四月底五月初會當開始每日挽。這時陣ê台灣中南部是漸漸從寒天(kuânn-thinn)欲轉入去(tsuán-tńg-jı̍p-khì)熱天(jua̍h-thinn)的氣候。圖/Pixabay

庄跤ê農民若欲(ná-beh)平時就有錢水(收入),就愛種作(tsìng-tsoh)短期間就會當收成ê經濟作物(tsok-bu̍t)。但是種作這種(tsit-tsióng)短期經濟作物ê蔬菜瓜仔類厚工(kāu-kang 註1)日日都縛牢咧!毋是逐戶農民攏會堪值(lông-ē-kham-tī註2)做ê。遮个(tsia-ê)作物中以種韮菜挽韮菜花尚界厚工辛苦。但是哞(mā卻是)尚有錢水。韮菜花置四月底五月初會當開始每日挽。這時陣ê台灣中南部是漸漸從寒天(kuânn-thinn)欲轉入去(tsuán-tńg-jı̍p-khì)熱天(jua̍h-thinn)的氣候。冬天蓋ê棉襀被(mî-tsioh-phuē)猶未當收起來(iah-buē-tang-siu-khí-lāi註3),但是暗頭也(àm-thâu-ā註4)閣傷熱蓋袂久。置按呢(àn-ni如此)蓋被踢被ê困擾中,一直到半暝才會通(ē-thang 能夠)入眠!第二早起(tē-jī-tsai-tsái-khí註5)天才拍潽光(phah-phu-kng註6)的時大人就喝講:「起來囉!愛來去挽韮菜花!」在這尚界愛睏ê時陣,得愛(tik-ài)等大人催喝三四介了後才不得不從眠床頂爬起來。雙手ka目睭挼挼(juê-juê揉揉)--leh勉強行上路(bián-kióng kiànn-tsiūnn-lōo)。

佇這早春ê透早是白濛罩霧(pe̍h-bông-tà-bū)。路面上ê行人(hîng-jîn)就若像雲霧中ê遊魂,時廕時現(sî-ìm-sî-hiàn)。終於行來到韮菜園。每秝(bôo叢)韮菜尚少有五六枝韮菜花等待(tán-thāi)咱來採挽。這時陣得愛集中精神,目睭擘乎金(ba̍k-tsiu peh-hôo-kim註7)全神觀看每枝韮菜花頂ê花莓(hue-m̂)。花莓若是已經飽米"含苞待放"(hâm-pau-tāi-hòng),今也日(kin-ā-jı̍t今天)無ka挽明也載(bîn-ā-tsài 明天)就會開花。這時若是無挽大人看着就會駡講「討債」(thó-tsè浪費)。抑若花莓猶未(iah-buē尚未)飽米就ka挽起來,大人會駡「拍損」(phah-sńg折損)。只好兩蕊目睭金金相(kim-kim-siòng看準),揣彼(tshuē-he註8)該挽愛挽ê花枝。用三支手指頭仔自花莓開始順咧伸(tshun)到底將這枝韮菜花攥(tsuàn扭斷)起來。若是攥無到底猶閣留一截白霧ê花頭時,大人哞會駡講「討債」。佇這濛霧ê透早,規叢韮菜佮韮菜花是結一重(tîng層)露水。手指頭仔挽無偌久就凍甲痲痲(bâ)無感覺。一領短褲也涂(tôo濡)甲澹澹澹(tâm濕透)。兩支徛宁(khiā-tuà站在)土面ê赤跤(tshiah-kha)也寒佫凍(gân-koh-tàng註9)。細漢gín-á的手細支,挽了二十外枝韮菜花就趕緊走去路頭提予老父整理。希望聼著老父一句呵咾(o-ló註10)ê聲音!

約二點鐘後就傳來庄內學生gín-á絞陣(ká-tîn註11)欲去學校ê呼聲。讀國校ê兄哥就手放咧用走ê轉去厝裡。緊緊扒pe)一碗飯了後ka茭褶(ka-tsih註12)册包提咧踨(tuè跟)大家做陣去學校。抑(iah)我這免去學校ê細漢gín-á就只有踨大人繼續挽菜花。了後看老父將韮菜花每五斤用稻草稿綑做一把。欲載去西螺菜市場賣時我會儘量吵欲踨老父去!抑若焉呢(iah-ná-ian-ne註13)我就卯著也(báu-tioh-ā註14)。到菜市場上界無哞有(siāng-kài-bô-ma-ū註15)一碗韮菜煮豬血湯好食。較好運ê時會通到市場食攤(sı̍t-than)食(tsia̍h)油蒽粿,甚至是糋寛焍(tsí-khuann-te)。

註:1.工作繁多;2.都能夠;3.還不能收起來;4.剛入夜時;5.第二天一大早;6.天剛亮;7.張大眼睛;8.找那些;9.極冷又凍;10.讚美;11.成群結隊;12.草蓆袋;13.果真如此;14.撿到好處 ;15.最少也有

(原文刊載於2018-07-19美國南加州太平洋時報)


文章屬作者個人意見,文責歸屬作者,本報提供意見交流平台,不代表本報立場

留言板
相關新聞列表