新聞標題【民報】【台語世界/錄音】少年台語老師ê心聲
寄件人 E-mail
收件人 E-mail

【台語世界/錄音】少年台語老師ê心聲

 2018-12-14 11:20
Ē記得拄仔開始教課ê時tsūn,無幾个人攑手,到尾--à,我愈上愈suà-phah,變做是學生攑手攑--過--ê又閣愛beh講,實在不止仔趣味!圖/作者提供
Ē記得拄仔開始教課ê時tsūn,無幾个人攑手,到尾--à,我愈上愈suà-phah,變做是學生攑手攑--過--ê又閣愛beh講,實在不止仔趣味!圖/作者提供

是按怎behtsit篇:
台語是老人lehê語言,伊是lán ê資產,講台語、用台語,tsiah thang走揣著tsit phiàn土地ê歷史kap文化。來看少年台語老師ê心聲,做伙來學台語,一代thn̂g一代,只要語言tī--leh,文化就拍無--去。

Tsit-má tsit个社會,ē-tàng聽著囡仔講台語講kah真liàn-tńg--ê,已經tsiânn稀罕--ah!我逐工出門聽--著--ê,lóng是講華語khah濟。我kā一个賣早頓ê阿姊講「Gâu早」,伊應講『早安』,啊我明明就kā講台語,伊koh應華語!Lán台灣人普遍無自信,想講講華語khah高尚,tsit種觀念m̄-tio̍h,ē害lán ê囡仔失去在地文化ê根本。

Lán想beh hōo人看ē起,tio̍h-ài先尊tshûn家己ê語言。台語是lán寶貴ê文化資產,是tsiok suí ê語言。我是少年ê母語老師,tī舊年(2017)tsiah開始正式教國小ê台語課。我tī做長期代課老師進前,就bat做過短期--ê。Hit个時tsūn,我iáu-koh bē-hiáu羅馬字,我無想hiah濟,就勻勻仔做,有課就bóng上、bóng代課,mā算是一種學習──真正感謝hit當時有tsit个機會,我tsiah開始對台語教學有興趣,mā開始去學羅馬字,開始我為台語拍拚ê人生。

後--來,我教--過ê囡仔lóng tsiok愛我ê台語課。逐工若是看著我,就tsiok有精神--ê,叫我「嘉徽老師」,有影tsiok感心。上我ê課,ē-sái算趣味,是按怎講neh?每一節課,我lóng ē tshuā in唸,koh hōo in ē-tàng唱歌kap跳舞;表現了好--ê,我就kā tǹg印仔。我ê課有分組比賽,到學期尾,佗一組第一名,就有禮物thang領,逐个學生lóng真骨力表現。我mā hōo in講台語ê機會,親像造句,iah是我講一个主題,hōo in表達家己ê想法,若tsiâu用台語講--ê,ē-tàng有個人ê加分。

Ē記得拄仔開始教課ê時tsūn,無幾个人攑手,到尾--à,我愈上愈suà-phah,變做是學生攑手攑--過--ê又閣愛beh講,實在不止仔趣味!總講--一-句,雖bóng我少年,m̄-koh對台語教學真有心。我一定ē繼續拍拚,hōo台語課koh-khah心適,hōo囡仔學台語ē-sái輕鬆koh學著tsiânn濟mi̍h件,ǹg望tsia-ê囡仔以後大漢ē koh對我tsit个老師有印象。

我是少年ê母語老師,我上愛講台灣話,lán做伙來講、做伙拍拚,hōo lán tsit phiàn土地ê語言kap文化koh-khah有尊嚴,繼續thn̂g湠--落-去,好--無?

hōo你聽:

(作者今年27歲,tī高雄ê國校教台語,是台語支援教師。)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢;『 』內底用華語發音。

延伸閱讀:
【台語世界/錄音】為台語老師請命
【台語世界/錄音】台語教學ài趣味mā ài專業 

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

留言板
相關新聞列表