新聞標題【民報】​【台語世界/錄音】石虎的厝
寄件人 E-mail
收件人 E-mail

​【台語世界/錄音】石虎的厝

 2018-12-12 14:40
行到半路的時,有一位記者發現阿石,伊知影阿石毋是一般的貓咪,是石虎neh!伊大聲huah講:「恁看!遐有一隻石虎!」示意圖/取自維基共享資源,By Kuribo
行到半路的時,有一位記者發現阿石,伊知影阿石毋是一般的貓咪,是石虎neh!伊大聲huah講:「恁看!遐有一隻石虎!」示意圖/取自維基共享資源,By Kuribo

是按怎behtsit篇:
台灣早期平地、淺山,lóng thang看著石虎ê影跡;後--來因為人類ê開發,in ê棲地hông破壞,數量愈來愈少,kiōng-beh孤毛tse̍h--ah。本文用古錐ê文字,講述石虎ê故事,說明正確ê保育觀念,真適合爸母tshuā囡仔做伙來讀őo

有一隻足古錐的石虎,伊的名叫做阿石。阿石hām伊的爸爸、媽媽,猶閣有伊的小弟、小妹,攏蹛佇咧樹林仔內底,快樂過日。有一工,阿石in規家伙仔閣佇咧樹林仔內底,peh懸peh低。石虎in足gâu拍獵--ê,想欲揣看覓敢有細隻的鳥鼠,猶是有鳥仔thang食--無。當in咧走揣、目睭金金siòng的時,雄雄樹仔一欉接一欉,連相紲倒--落-來。為啥物會按呢?因為人--à,想欲起大樓,欲起踮山頂的空地仔,就kā樹仔剉掉。

石虎足可憐--ê,in原本咧耍、咧生活的好所在,煞hông破壞了了,變做無所在thang蹛--矣。閣較淒慘--ê是,in一家伙仔拆分開,阿石hām伊爸爸媽媽、弟弟妹妹走四散,無法度閣再做伙過日子。阿石開始一个人流浪,流浪到山跤的時tsūn,伊拄著一隻貓仔囝叫做阿咪(A-mi)。阿咪kā阿石講:「Heh!你嘛是一隻貓咪honnh,我嘛是neh!咱交一下朋友,好--無?」阿石講:「我才毋是貓!我是石虎neh!」阿咪閣再斟酌kā阿石siòng--一-下,講:「你看--起-來足成--ê啊!你是貓,我嘛是貓啊!」阿石應講:「毋是--啦!我是石虎--啦!」阿咪講:「Bua̋-kín--啦!無,你kap阮做陣來阮兜啊。遐有足濟貓咪,是一个大家族。」石虎想講按呢嘛較有伴,就hām阿咪做伙轉in兜。

阿虎逐工kap貓仔in鬥陣食穿,攏有新的貓咪thang熟似。日子一工一工過,阿石嘛過了慣勢慣勢,hām貓仔家族tsiânn做好朋友。有一工,阿咪kā伊講:「阿石,阮欲來去遊行,你欲同齊去--無?」這場遊行,有真濟台灣的貓咪kap阿狗參加,in欲愛訴求講有真濟人飼貓、飼狗,煞kā in放sak,放in佇咧街頭巷尾流浪,嘛有真濟人對狗仔囝、貓仔囝真無好,會kā in虐待(gi̍k-thāi)、苦毒。貓咪hām阿狗想欲借這場遊行,kā人類講愛尊重in的性命kap生活。阿石kā阿咪講伊嘛想欲來去。阿石、阿咪hām貓咪家族、阿狗in鬥陣行去街頭遊行,放送in的訴求。

行到半路的時,有一位記者發現阿石,伊知影阿石毋是一般的貓咪,是石虎neh!伊大聲huah講:「恁看!遐有一隻石虎!」所有的記者就趕緊提kha-mé-lah來翕。阿石的目睭予閃光燈(siám-kong-ting)tshiō kah thí袂金。伊講:「逐家mài閣翕--矣!按呢我的目睭足無爽快!」記者煞講:「你是一隻石虎neh!阮是欲kā你保護,石虎就咧欲佇台灣看無--矣!逐家緊kā伊抱--起-來……。」阿石liam-mi大聲huah:「我buaih hông抱,恁欲kā我抱去佗?」有人講:「你免煩惱--啦!你愛hông保護啊!按呢你才會當好好過日,嘛會當活較久長。」阿石伊大聲應講:「我buaih!」

伊行去上頭前,kā逐家演講,講:「逐家好,多謝恁遮要緊--我。但是,恁敢知影啥物才是上好的保護?毋是kā我掠去保護中心保護就是保護。我希望恁逐家,會當保護樹林,mài閣剉樹仔、開墾阮自細漢蹛到大的所在,予阮一phiàn會當遮風覕雨的樹林仔,快快樂樂kap我的爸母、小弟小妹做伙,一家口仔團圓,就是上好的保護。」

阿狗hām貓咪聽了攏真贊成,盡力kā拍噗仔。這時,遮的記者kap其他的人嘛認為阿石講--ê真有道理,逐家就開始發動,對種樹仔開始,嘛規定袂使閣再烏白剉樹仔。樹仔栽沓沓仔抽懸,石虎嘛有樹林仔thang生活過日,因為in的「厝」愈來愈開闊,會當佇四界peh起peh落。落尾,阿石嘛kap伊的爸爸媽媽、弟弟妹妹團圓,規家伙仔又閣同齊拍獵--矣!

hōo你聽:

(作者是台灣師範大學台灣語文學系副教授;本文由台灣母語聯盟提供。)
註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

延伸閱讀:
【台語世界/錄音】寶惜精牲
【台語世界/錄音】樹木ê利益

若beh投稿,請寄:binpotgb@gmail.com,文章字數 600~800;文章若採用,有淡薄仔稿費。
請上【台語世界】閱讀koh-khah濟相關文章。


專欄屬作者個人意見,文責歸屬作者,本報提供意見交流平台,不代表本報立場。

留言板
相關新聞列表