新聞標題【民報】【台語世界/錄音】拍破按算好勢ê生活步調
寄件人 E-mail
收件人 E-mail

【台語世界/錄音】拍破按算好勢ê生活步調

 2020-03-21 12:28
中國暴發武漢肺炎,òe kah通世界攏有。咱台灣koh是tī中國ê門喙,逐日往來ê人hiah-nī濟,哪有可能無受影響。人講:「千算萬算m̄值著天一劃」,真正規欉好好─無錯。。圖/總統府
中國暴發武漢肺炎,òe kah通世界攏有。咱台灣koh是tī中國ê門喙,逐日往來ê人hiah-nī濟,哪有可能無受影響。人講:「千算萬算m̄值著天一劃」,真正規欉好好─無錯。。圖/總統府

人講:「千算萬算m̄值著天一劃」,真正規欉好好─無錯。今年ê寒假taⁿ-á開始就過年,án-ne過年soah,猶有真長ê假期thang歇,會使穩心仔chhit-thô、渡假--一下。Siáng知?1个中國武漢肺炎soah拍破濟濟人ê生活步調,真正是「人gâu,上驚天做對頭」。

過年前,中國暴發武漢肺炎,òe kah通世界攏有。咱台灣koh是tī中國ê門喙,逐日往來ê人hiah-nī濟,哪有可能無受影響。逐工聽著染病kap死亡ê人數,hō͘人心驚膽嚇。規个年節過kah無味無素。自頂擺台南地動維冠大樓倒--去,死真濟人;koh有花蓮大地動,傷亡嘛真嚴重;到這擺中國武漢肺炎,koh-khah使人驚惶。這幾个事件,攏拄好tī過年。Hō͘年節ê氣氛變kah真bái,逐个人攏過了無真歡喜。

是講,過年前就kā beh去墾丁chhit-thô、渡假ê房間訂好勢--矣,無來去嘛bē-sái--chih。時間定tī新正ê初6、初7、初8三工。Kap牽手2个車駛--leh沿路chhit-thô,沿路向南台灣出發。規路人無濟、車嘛無濟,這敢是中國武漢肺炎ê關係﹖Hō͘阮耍著put-lí-á輕鬆。這回ê假期,除了渡假、chhit-thô以外,想beh kā台灣幾个仔猶無行過ê路段,kap m̄ bat去--過ê所在行--1 chōa。第一,就是台61號線通車了後ê南部段;第二,就是南迴公路ê草埔磅空;第三,就是屏東縣ê來義kap春日這2个鄉。最後,因為to͘-ha̍p上ê關係,南迴公路ê草埔磅空去無成,taⁿ著留kah後擺chiah koh拜訪。

中國武漢肺炎ê疫情猶koh直直衝懸。逐工所報ê病例kap死亡人數,hit種增加ê速度,hō͘人料想bē到,看bē出有降溫ê現象。咱政府當然會緊張,驚疫情防治ê防線若來破空,代誌就真歹收soah。不得已,教育部宣佈高中以下ê學校,寒假延長2禮拜,暑假縮短2禮拜。Án-ne,soah hō͘咱原始計畫好勢ê生活步調,一下仔攏亂--去。假期hiông-hiông加出2禮拜,beh安排chhit-thô、渡假,koh m̄敢去人濟ê所在。若是beh規工閒閒無代誌關tī厝內,恐驚會關kah生蝨母,真正害代。我看就緊koh計畫一下仔khang-khòe來做,才是頭路。

Phah-phòa Àn-sǹg Hó-sè ê Seng-oa̍h Pō͘-tiāu

Bûn, lio̍k-im/ Kang Têng-chhiū

    Lâng-kóng “chhian sǹg bān sǹg m̄-ta̍t tio̍h thiⁿ chi̍t oe̍h”, chin-chiàⁿ kui-châng hó-hó—bô-chhò. Kin-nî ê hân-ká taⁿ-á khai-sí tō kòe-nî, án-ne kòe-nî soah, iáu-ū chin-tn̂g ê kà-kî thang hioh, ē-sái ún-sim-á chhit-thô, tō͘-ká--chi̍t-ē. Siáⁿ chai﹖Chi̍t ê Tiong-kok Bú-hàn hì-iām soah phah-phòa chē-chē lâng ê seng-oa̍h pō͘-tiāu. Chin-chiàⁿ sī “lâng gâu, siōng kiaⁿ thiⁿ chò tùi-thâu”.

Kòe-nî chêng, Tiong-kok po̍k-hoat Bú-hàn hì-iām, òe kah thong sè-kài lóng ū. Lán Tâi-oân koh sī tī Tiong-kok ê mn̂g-chhùi, ta̍k-ji̍t óng-lâi ê lâng hiah-nī chē, ná ū khó-lêng bô siū éng-hióng. Ta̍k-kang thiaⁿ-tio̍h jiám-pēⁿ kap sí-bông ê lâng-sò͘, hō͘ lâng sim-kiaⁿ-táⁿ-hiaⁿh. Kui-ê nî-cheh kòe kah bô-bī-bô-sò͘. Chū téng-pái Tâi-lâm tē-tāng Ûi-koàn tōa-lâu tò--khì, sí chin chē lâng. Koh ū Hoa-lian tōa tē-tāng, siong-bông mā chin giâm-tiōng. Kàu chit pái Tiong-kok Bú-hàn hì-iām, koh-khah sú lâng kiaⁿ-hiâⁿ. Chit kúi ê sū-kiāⁿ lóng tú-hó tī kòe-nî, hō͘ nî-cheh ê khì-hun piàn kah chin bái. Ta̍k-ê lâng lóng kòe liáu bô chin hoaⁿ-hí.

Sī kóng, kòe-nî chêng tō kā beh khì Khún-teng chhit-thô, tō͘-ká ê pâng-keng tēng hó-sè--ah. Bô lâi-khì mā sī bē-sái--chih. Sî-kan tēng tī sin-chiaⁿ chhe-la̍k, chhe-chhit, chhe-peh 3 kang. Kap khan-chhiú 2 ê, chhia sái--leh iân-lō͘ chhit-thô, iân-lō͘ hiòng lâm Tâi-oân chhut-hoat. Kui-lō͘ lâng bô chē, chhia mā bô chē, che kám-sī Tiong-kok Bú-hàn hì-iām ê koan-hē? Hō͘ goán sńg-tio̍h put-lí-á khin-sang. Chit hôe ê kà-kî tî-liáu tō͘-ká, chhit-thô í-gōa, siūⁿ beh kā Tâi-oân kúi-ê-á iáu bô kiâⁿ--kòe ê lō͘-tōaⁿ kap m̄ bat khì--kòe ê só͘-chai kiâⁿ--chi̍t-chōa. Tē-it, tō-sī Tâi 61 hō sòaⁿ thong-chhia liáu ê lâm-pō͘ lō͘-tōaⁿ. Tē-jī, tō-sī Lâm-hôe kong-lō͘ ê Chháu-po͘ pōng-khang. Tē-saⁿ, tō-sī Pîn-tong koān ê Lâi-gī kap Chhun-ji̍t chit 2 ê hiong. Chòe-āu, in-ūi to͘-ha̍p siōng ê koan-hē, Lâm-hôe kong-lō͘ ê Chháu-po͘ pōng-khang khì bô sêng. Taⁿ tio̍h lâu kah āu-pái chiah-koh pài-hóng.

    Tiong-kok Bú-hàn hì-iām ê e̍k-chêng iáu-koh ti̍t-ti̍t chhèng-koân. Ta̍k-kang só͘ pò ê pēⁿ-lē kap sí-bông lâng-sò͘, hit chióng cheng-ka ê sok-tō͘ hō͘ lâng liāu-sióng bē kàu, khòaⁿ bē chhut ū kàng-un ê hiān-siōng. Lán chèng-hú tong-jiân ē kín-tiuⁿ. Kiaⁿ e̍k-chêng hông-tī ê hông-sòaⁿ nā lâi phòa-khang, tāi-chì tō chin pháiⁿ siu-soah. Put-tik-í, Kàu-io̍k-pō͘ soan-pò͘ ko-tiong í-hā ê ha̍k-hāu hân-ká iân-tn̂g 2 lé-pài, sú-ká  sok-té 2 lé-pài. Án-ne, soah hō͘ lán goân-sú kè-ōe hó-sè ê seng-oa̍h pō͘-tiāu, chi̍t-ê-á lóng loān--khì. Kà-kî hiông-hiông ke chhut 2 lé-pài. Beh an-pâi chhit-thô, tō͘-ká, koh m̄ káⁿ khì lâng chē ê só͘-chāi. Nā-sī beh kui-kang êng-êng bô tāi-chì koaiⁿ tī chhù-lāi, khióng-kiaⁿ ē koaiⁿ kah seⁿ sat-bó, chin-chiàⁿ hāi-tāi. Góa khòaⁿ, tō kín koh kè-ōe chi̍t-ê-á khang-khòe lâi chò, chiah sī thâu-lō͘.

讀hōo你聽:

 

留言板
相關新聞列表